Alarmi i gripit të shpendëve, ende 11 vatra aktive në vend

11 vatra të gripit të shpendëve mbeten ende aktive në vend. Lajmin e bëri të ditur zëvendës Ministrja e Bujqësisë, Ermira Gjeçi.

“11 vatra janë aktive, të vogla, të lokalizuara, sa i përket pulave të ngordhura janë 560 mijë në total. Pjesa dërrmuese ka qenë tek 2 stabilimentet e konfirmuara në Durrës”.

“Infektimet kanë ndodhur tek stabilimente që prodhojnë vezë, në Durrës. Stabilimentet për mish janë të pastra dhe nuk kemi asnjë dyshim për 65 fermat që ndodhen në territorin e vendit”.

Sipas Gjeçit nuk ka asnjë provë se ky grip i rrezikon njerëzit nëse konsumojnë produktet e shpendëve.

“Nuk ka asnjë rast në botë që konfirmohet infektimi i qenieve njerëzore nga produktet e shpendëve, mishi apo vezët”.

Përveç pulave në Shqipëri janë prekur nga gripi i shpendëve edhe pelikanët, 4 prej të cilëve të konfirmuar në Korçë dhe Divjakë. Ekspertët dyshojnë se pikërisht migrimi i tyre në këtë periudhë të pranverës ka ndikuar në përhapjen e virusit.