Drejtoria e Përgjithshme e Pastrimit dhe Gjelbërimit i jep tenderin me vlerë 73 milionë lekë të vjetra pa TVSH kompanisë “Besnik Meçi” duke skualifikuar konkurrentin Power Industries shpk. Shkak për skualifikimin e kësaj të fundit është bërë mosparaqitja e sigurimit të ofertës.
Në datën 4 prill është shpallur fituesi për mirëmbajtjen e mjeteve të transportit ku bën përshtypje fakti se do të harxhohen 80 milionë lekë të vjetra për një muaj vetëm për mirëmbajtje sipas dokumentave standarte të tenderit. Në kontratën me numër REF-22191-03-16-2022 parashikohet mirëmbajtja e pajisjeve të rreth 15 makinave të cilat janë në varësi të DPPGJ-së.
Nuk është hera e parë që kompania e Besnik Meçit merr tendera me flamuj të kuq në bashkinë e Tiranës të cilët mbartin rreziqe për korrupsion dhe klientelizëm sipas Open Data Albania.
Rasti i parë është në datën 10 shtator 2019 për tenderin për pjesë këmbimi për pajisje të montuara me mjete me vlerë 27 milionë lekë pa TVSH me afat 12-mujor ku përsëri kemi skualifikim konkurrentësh. Në këtë rast kemi patur 6 operatorë ekonomik ku 5 prej tyre janë skualifikuar duke shpallur fituese kompaninë e Besnik Meçit dhe procedura e prokurimit është shënuar me flamur të kuq nga Open Data.
Rasti i dytë në bashkinë e Tiranës është tenderi për riparimin e pompave, të puseve dhe shatërvanëve në 4 shtator të vitit të kaluar të organizuar nga Drejtoria e Përgjithshme të Pastrimit dhe Gjelbërimit. Tenderi ka numër reference REF-04872-09-09-202 dhe ofertë fituese prej 13 milionë lekë të reja me afat një muaj. Në garë ka marrë pjesë vetëm kompania “Besnik Meçi” e cila është shpallur automatikisht fituese për mungesë konkurrentësh. Kjo kompani rezulton të ketë nënshkruar 14 kontrata me bashkinë e Tiranës me një vlerë prej 301 milonë lekë të vjetra pa TVSH.
Në total vetëm nga qeverisja vendore, Besnik Meçi ka marrë tendera me vlerë 1,4 miliardë lekë të vjetra pa TVSH ndërsa numri total i tenderave me dyshime për korrupsion sipas Open Data është 13 me vlerë 523 milionë lekë të vjetra pa TVSH ose 37,3% e të gjithë vlerës së qarkulluar nga tenderat e bashkive.
Discussion about this post