I fuar në emisionin “Zonë e Lirë”, deputeti Belind Këlliçi u shpreh se për momentin nuk ka ambicie personale për të marrë drejtimin e PD. Këlliçi tha se ajo që dëshiron është një PD që të jetë fituese. I pyetur se sa shanse ka të bëhet kryetar i PD duke përfituar nga dueli Berisha-Kim, Këlliçi tha se ka zero shanse që të ndodhë.
Ai gjithashtu shtoi se gjithashtu ka zero shanse që të bëhet kryetar i PD, duke i bërë hiqje Enkelejd Alibeajt. Deputeti u pyet se sa shanse ka të bëhet kryetar i PD, nëse Berisha nuk kandidon, ndërsa u shpreh “kjo bëhet garë interesante, por Berisha nuk bën hapa pas”.
Ai gjithashtu tha se nuk ka një garë mes ambasadores amerikane Yuri Kim dhe ish-Kryeministrit Sali Berisha. Sipas itj, betejën me “non grata” Berisha e ka të ndarë nga ajo e drejtimit të PD-së. “6 Marsi tregoi se non grata ka një peshë të caktuar në elektorat dhe këtu mbyllen debatet”, tha Këlliçi.
Lidhur me qëndrimin e ambasadores Kim që njeh Enkelejd Alibeajn si kryetar të komanduar të PD, Këlliçi tha se “ky është një qëndrim personal i ambasadores, i shprehur në Twitter. Unë mendoj se askush, as diplomatët dhe as politikanët, nuk mund të qëndrojnë mbi vullnetin e anëtarëve të një force politike dhe mbi vendimet e gjykatave”.
“Do të fitojë vullneti i anëtarëve të Partisë Demokratike”, tha Këlliçi, duke shtuar se reagimi i zv. Ndihmës Sekretarit amerikan të Shtetit, nuk ishte se kush duhet të jetë kryetar i PD, por ai ndërhyri në përplasjet e krijuara mes Berishës dhe ambasadores Kim.
Deputeti demokrat tha se z.Escobar bëri një reagim, por nuk besoj se ai ishte më i tronditur se Palmer, kur Lulzim Basha dogji mandatet e deputetëve. “Dy vjet më pas amerikanët nisën të mbështesin Lulzim Bashën, pra politika amerikane është fluide”, tha Këlliçi.
Analisti Arjan Curri në replikë me Këlliçin tha se nëse në krye të PD zgjidhet Sali Berisha, nuk përjashtohet mundësia që e gjithë PD të shpallet një organizatë “non grata”.
“Mund ta izolojnë totalisht dhe amerikanët e kanë paralajmëruar dhe kur e thonë e mbajnë fjalën”, tha Curri.
Discussion about this post