Superiorja dhe Kategoria e Parë kanë në plan ndeshje të tjera të rëndësishme për sot. Në elitën e futbollit shqiptar në program janë dy ndeshje për llogari të javës së 30-të.
Në orën 16:45 Vllaznia do të presë Partizanin dhe synon t’i marrë vendin e katërt, si dhe më pas të shohë edhe më për lart pasi Kukësi e Laçi përballen mes tyre në “Kukës Arena” prej orës 20:00.
Derbi i Veriut luhet në stadiumin e ri, që inaugurohet sot. Gati tre vite jashtë fushe për verilindorët, që duan ta nisin me këmbë të mbarë në stadiumin e ri dhe të afrohen edhe më shume me Europën. Me Laçin sigurisht nuk do të jetë e lehtë.
Sa i takon Kategorisë së Parë, prej orës 15:00 do të luhen të gjitha ndeshjet e javës së 28-të. Bylisi që kërkon ta mbyllë në vendin e parë përballet në transfertë me Tomorin, që po tenton të sigurojë gjashtëshen e parë.
Erzeni i vendit të dytë pret Besën, ndërkohë që një duel të vështirë ka në program Apolonia ndaj Burrelit. Interesante edhe sfida Tërbuni-Turbina. Lushnja, Korabi dhe Pogradeci luajnë në transferta kundër ekipeve të rëna në Kategorinë e Dytë: Vora, Shkumbini dhe Maliqi.
Discussion about this post