Arrestimi i drejtorit të burgut të Reçit, Manja: Kush shkel ligjin është në duart e drejtësisë

Ministri i Drejtësisë Ulsi Manja ka reaguar në lidhje me arrestimin e drejtorit të komanduar të burgut të Reçit.

“Ne vazhdojmë punën por persona që marrin detyrën dhe bien në konflikt me ligjin janë në duart e drejtësisë”, tha Manja.

Po ashtu ai ka deklaruar se harta e re gjyqësore shumë shpejt do të kalojë për miratim nga qeveria.

“Harta e re gjyqësore shumë shpejt do të jetë në qeveri. Do kemi një konsultim të dytë dhe pastaj me propozimin tim do kalojë në qeveri. Duhet kostuar harta e re gjyqësore nga ministria e Financave”, tha ministri.

“Njësia anti korrupsion ka një dinamikë çështjesh në lidhje me pronat. Është çështje që po e përgatisim me sukses. Kur të jetë e dokumentuar me prova do  të dalim para jush. S’ka stopim të punës”, është shprehur Manja.

Kujtojmë që Shërbimi i Kontrollit të Brendshëm të Burgjeve ka arrestuar drejtorin e komanduar në IEVP Reç-Shkodër, Ervis Zikën,pasi dyshohet se ka shpërdoruar detyrën për vjedhje dhe futjen e sendeve të ndaluara në ambientet e vuajtjes së dënimit.

Në lidhje me vjedhjen ka marrë karburant duke firmosur kartela fiktive. Për abuzim me karburantin po hetohen edhe ish-zyrtarë të tjerë. Ndërkohë që ka hyrë në regjim pa kaluar në skaner dhe ka dyshime që ka futur sende të ndaluara.