Liverpool siguron finalen e dhjetë në Champions League në historinë e vet, pasi fitoi edhe ndeshjen e dytë gjysmëfinale kundër Villarreal me rezultatin 3-2. Në “Anfield” anglezët kishin fituar 2-0, ndërkohë që ndeshja e sotme kishte shumë emocione.
Nisje si në ëndrra ajo e Villarreal, që ia doli të ndëshkonte skuadrën e Liverpool që në minutën e tretë me Dia, i cili brenda zone nuk fali. “Nëndetësja e verdhë”, e motivuar nga tifozët dhe goli, vijoi të sulmonte.
Dani Parejo dhe Gerard Moreno më pas bënë me zemër skuadrën e Jurgen Klopp, por nuk shënuan dot golin e dytë. Në minutën e 37-të Lo Celso përfundoi në tokë dhe vendasit pretenduan penallti, por nuk ishte i atij mendimi arbitri i ndeshjes.
Villareal gjithsesi ia doli ta mbyllte pjesën e parë me festë, pasi Couquelin e dërgoi topin në rrjetë me një goditje me kokë dhe spanjollët nisën të besojnë te mrekullia. Sigurisht ndaj Liverpool nuk mund të jetë kurrë e lehtë.
Djemve të Klopp iu duhej një gol dhe ai që flirtoi ishte Alexander-Arnold, që e dërgoi topin në traversë. Sulmet e “The Reds” vijuan dhe anglezët ia dolën të shënojnë në minutën 62-të. Fabinho ndëshkoi vendasit, falë edhe pakujdesisë së portierit.
Ai gol ishte një çlirim dhe një goditje për Villarreal, që kapitulloi më pas. Luis Diaz tregoi që jo më kot e kanë blerë te Liverpool, duke i barazuar shifrat, kurse Sadio Mane në minutën e 74-t përmbysi gjithçka.
Spanjollët u zgjuan, nuk kishte kohë më për ëndrra dhe tani janë jashtë Champions League me kokën lart. Në minutat e mbetura Johns iu afrua edhe golit të katërt për Liverpool, por u ndal nga portieri dhe rezultati nuk ndryshoi deri në fund.
Discussion about this post