Grupi Parlamentar i Partisë Demokratike reagoi pas mbledhjes së djeshme të 21 deputetëve të saj për çështjen e zgjedhjes së presidentit konsensual dhe propozimeve të emrave për komisionet e Reformës Zgjedhore, Territoriale dhe për Investimet Strategjike. Në një deklaratë të përbashkët, 21 deputetët e partisë më të madhe opozitare e konsideruan qëndrimin e mazhorancës për presidentin e ri si fasadë dhe mashtrim teksa pretendojnë se kryeministri Edi Rama e ka përcaktuar tashmë se kush do të jetë pasuesi i Ilir Metës në krye të Presidencës.
“Kur morëm vendimin për ndërtimin e një procesi gjithëpërfshirës, ishim të ndërgjegjshëm që regjimi i Edi Ramës kishte paracaktuar emrin e Presidentit dhe se qëndrimi i tij publik se dëshiron një President konsensual me opozitën ishte fasadë dhe mashtrim”, shkruhet në një pjesë të deklaratës së 21 deputetëve të PD. Megjithatë, pavarësisht ngecjes së bisedimeve pozitë-opozitë për zgjedhjen e presidentit me konsensus të përbashkët, grupi i 21 deputetëve që morën pjesë dje në mbledhje konfirmuan se partia e tyre do të angazhohet deri në fund për të votuar një president të pranuar nga të gjitha palët. “Grupi Parlamentar i PD mbetet i angazhuar në vullnetin e tij për nje proces gjithëpërfshirës dhe konsensual për zgjedhjen e Presidentit të Republikës. Shqiptarët meritojnë një President të gjithëpranuar, që i shërben interesit publik dhe jo interesit të pushtetit të Edi Ramës”, mbyllet deklarata e grupit të 21 deputetëve demokratë.
Discussion about this post