“Sunny Hill Festival” do të mbahet në Tiranë. Ky njoftim është bërë i ditur nga vetë faqja zyrtare e Instagramit të këtij festivali ku me moton “E njëjta datë, e njëjta eksperiencë e bukur, vendodhje ndryshe” është lajmëruar se “Sunny Hill Festival” do të mbahet në Tiranë.
Lidhur me njoftimin ka reaguar edhe kryeministri Edi Rama i cili shkruan përmes një statusi në rrjetin social facebook, se protagonistja e këtij festivali ylli i pop-it Dua Lipa do të qëndrojë javën e parë të gushtit, duke ftuar gjithë qytetarët të marrin pjesë.
Festivali nuk do të mbahet në Kosovë për shkak të vonesave nga institucionet që lidhen me lejet për lokacionin e caktuar. “Këtë gusht (për shkak të vonesave nga autoritetet në sigurimin e licencave të nevojshme për vendndodhjen), jemi të detyruar të shkojmë në Tiranë.
Ne duam të informojmë të gjithë mbajtësit tanë të biletave se biletat e tyre janë të vlefshme për Sunny Hill Festival 2022 – Tirana Edition, ndërsa ata që nuk mund të marrin pjesë në Festivalin në Tiranë, do të mund të rimbursojnë biletat e tyre. (Dritarja e rimbursimit do të hapet nga 1 korriku deri më 15 korrik.
Më shumë detaje dhe udhëzime do të jepen në ditët në vijim.)”, thuhet në njoftimin zyrtar. Ndërkohë, babai i Duas Lipës që është dhe organizatori i këtij festivali, ka reaguar përmes një shkrimi të gjatë, ku sqaron arsyen e këtij vendimi. Ai ka publikuar dhe letrën drejtuar krerëve të shtetit të Kosovës.
Discussion about this post