Vendimi i Bullgarisë për Maqedoninë e Veriut, Nikolla: KE, rrugën e hapur për çeljen e negociatave me Shqipërinë

Kryetarja e Kuvendit të Shqipërisë, Lindita Nikolla ka përshëndetur vendimin e Parlamentit të Bullgarisë për heqjen e vetos për Maqedoninë e Veriut.

Nikolla shprehet se heqja e vetos është një akt emancipues proevropian.

Sipas saj tashmë Këshilli Evropian e ka rrugën e hapur për çeljen e negociatave me Shqipërinë.

“Mirënjohje Asamblesë Kombëtare të Bullgarisë, Kryetarit (ad interim), z. Miroslav Ivanov,  dhe gjithë grupeve parlamentare, të shumicës dhe opozitës, për votimin pro heqjes së vetos dhe çeljes së negociatave me Maqedoninë e Veriut.Kjo votë e rëndësishme është një veprim i emancipuar dhe evropeist i parlamentarëve bullgarë, që çliron edhe vendimmarrjen e Këshillit Evropian për çeljen e negociatave dhe mbajtjen e Konferencës së Parë Ndërqeveritare me Shqipërinë”, shkruan Lindita Nikolla.

Kujtojmë që ditën e sotme  Maqedonia e Veriut ka statusin e vendit kandidat për BE tash e 17 vjet dhe ka marrë dritën jeshile për të filluar bisedimet e anëtarësimit në vitin 2020.

Me 170 vota pro, 37 kundër dhe 21 abstenim, ligjvënësit bullgarë votuan që të heqin VETO-n sipas kushteve të propozimit të presidencës franceze, me disa propozim-ndryshime të caktuara të propozim teksteve të procesit negociues.