Prej 30 vitesh qytetarët shqiptarë vazhdojnë të vuajnë problemin me regjistrimin e pronave. Të njëjtin shqetësim kanë edhe banorët e lagjes periferike të qytetit të Beratit, lagjes “Uznovë. Ata kanë kërkuar sot ndihmën e mediave për një nga problematikat më të mëdha që mbart kjo lagje (dikur fshat), që është regjistrimi i pronave të tyre (truall dhe toka). Ata tregojnë se në 7 qershor, 32 banorë të kësaj lagjeje kanë firmosur një peticion në emër të të gjithë banorëve dhe ja kanë dërguar Prefekturës së Qarkut Berat, Drejtorit të Përgjithshëm të ASHK-së Artan Lame dhe deputetëve të qarkut por ende nuk kanë marrë prej tyre një përgjigje.
Nëpërmjet këtij peticioni, banorët kanë kërkuar një ballafaqim me përfaqësuesit e institucioneve të sipërpërmendura, për të zgjidhur problemet e mbartura ndër vite të regjistrimit të pronave. Por, deri tani shprehen se nuk kanë marrë asnjë përgjigje. Banorët e Uznovës tregojnë se kanë afro 30-vjet që dergjen dyerve të zyrave, duke u bërë viktima të disa mashtruesve që punojnë në ASHK Berat, të cilët për arsye përfitimi shfaqin paaftësi profesionale.
Banorët kërkojnë korrigjimin e gabimeve të konstatuara në Certifikatat e Pronësisë dhe korrigjimin e gabimeve në AMTP lidhur me sipërfaqet e trojeve për ndërtime masive, bashkëpronësi dhe saktësim kufiri. Ata sqarojnë se Uznova nuk ka mbivendosje dhe të gjitha trojet deri në vitin 1992 origjinën e kanë nga prona shtet. Banorët deklarojnë se, në arkivën e qarkut Berat mungojnë dokumentet e Këshillit të Bashkuar të NB (Ndërmarrjes Bujqësore që ka qenë dikur) për vitet 1990,1991 dhe 1992,të cilat janë asgjësuar në vitet e tranzicionit.
Discussion about this post