Kryetari i Alteranativës Shqiptare në Malin e Zi, Nik Gjeloshaj ka përhapur deklaratën e ambasadores amerikane në Malin e Zi, Judy Rising Reinke, e cila deklaroi se e mbështesin Ballkanin e Hapur duke u bazuar te parimet e BE-së.
Nëpërmjet Facebook-ut, Gjeloshaj hotë se edhe Kosova duhet të jetë pjesë e “Ballkanit të Hapur”. Sipas politikanit shqiptar në Malin e Zi, “Ballkani i Hapur” e konkretizon çështjen e njohjes reciproke mes Kosovës dhe Serbisë.
“Harkun e Ballkanit të Hapur do ta bëjnë Mali i Zi, Shqipëria dhe Maqedonia e Veriut – tre shtete anëtare të NATO-s, me mbështetje të madhe nga SHBA-ja. Kosova, si shteti më i ri, të jetë edhe pjesë e Ballkanit të Hapur. Domethënë bashkë me Serbinë dhe Bosnjë-Hercegovinën, gjithsej gjashtë shtete”, shkroi ai.
Duke shkruar se “Ballkani i Hapur” është “projekt i përbashkët i partnerëve tanë më të rëndësishëm ndërkombëtarë”, ai shtoi: “Ballkani i Hapur i jep fund njohjes reciproke të Serbisë dhe Kosovës dhe e mbyll çështjen më të rëndësishme të hapur mes shteteve të Ballkanit Perëndimor”.
Gjeloshaj shkruan se Mali i Zi nuk duhet të jetë inferior në këtë proces, por si anëtar i NATO-s, edhe pse vend i vogël, duhet të jetë ndër lojtarët kryesorë të projektit.
Discussion about this post