Nga Edi Oga
Aksidente rrugore ndodhin çdo ditë të vitit, por gjatë verës sikur shpeshtohen. Sikur shumëfishohen. Lajmet për vdekjet aksidentale, të thelluara deri në detaje të panevojshme, “popullojnë” portalet derisa një aksident më “i freskët” i mbivendoset një më “të përdoruri”!
Në një këndvështrim, portalet dhe televizionet bëjnë mirë që i pasqyrojnë këto fatkeqësi, megjithëse shpesh në mënyrë problematike, sepse mund të ndikojnë pozitivisht tek të ekspozuarit ndaj tyre për të reduktuar faktorët e rrezikut. Këto të fundit, njerëzit i dinë mirë dhe kanë kontroll të plotë mbi to, por i neglizhojnë duke përfunduar në aksidente shpesh fatale.
Më kujtohet se në fillimet e popullimit të Shqipërisë me makina, një pjesë e madhe e aksidenteve ndodhnin për arsye si këto:
- Çarje e gomës gjatë lëvizjes
- Dalje e rrotës gjatë lëvizjes
- Mosfunksionimi i beftë i frenave
- Bllokimi i papritur i timonit, etj.
Këto mund të quhen shkaktarë “të pakontrollueshëm” të aksidenteve dhe për fat të mirë po i ndeshim gjithnjë e më pak. Për fat të keq, aksidentet e sotme vijnë kryesisht prej shkaqesh plotësisht të kontrollueshme:
- Parakalim i nxituar dhe shpejtësi e madhe
- Përdorimi i celularit
- Përdorimi i substancave stimuluese.etj.
Mendoje veten sikur dikush të ka vrarë një të afërm në aksident. A do të gjeje dot paqe nëse aksidenti do të kishte ndodhur pse shoferi/shoferja e makinës përballë po i dërgonte dikujt një ‘?’ në whatsapp?!
Discussion about this post