Çfarë po ndodh me qeverinë italiane? “Sot mbaron teatri”, Draghi kërkon votëbesimin në Senat

Mario Draghi kërkoi që t’i jepet besim rezolutës së paraqitur nga senatori Casini në debatet për qeverinë që po zhvillohen në Senatin italian.

“Italia ka nevojë për një pakt të ri zhvillimi konkret dhe të sinqertë. Palë, a jeni gati ta rindërtoni këtë pakt? Jemi këtu në këtë Dhomë vetëm sepse e kanë kërkuar italianët. Është një përgjigje që duhet t’ua jepni të gjithë italianëve”, tha kryeministri.

Fjalimi i tij nuk u duartrokit nga deputetët e lëvizjes “5 Yjet” dhe pothuajse nga të gjithë senatorët e Lidhjes.

Draghi foli për vendimin e tij për të dhënë dorëheqjen si një zgjedhje “aq e dhimbshme sa duhej” dhe tha se ishte “shumë i impresionuar” nga apeli për të mbetur i nënshkruar nga 2,000 kryetarë bashkie. Ndërkohë qendra e djathtë, pas një samiti mes Salvinit dhe Berlusconit, doli me qëndrim të unifikuar duke i kërkuar Draghit të mos vazhdojë me këtë shumicë, por me një kabinet të ri ministror (thellësisht të ndryshuar).

“Rezoluta e Casinit? Sigurisht që ne nuk e votojmë”, tha Salvini, duke iu referuar bisedimeve për të vendosur mbi rezolutën e senatorit Casini.

Partia Demokratike mbajti kursin dhe konfirmoi besimin e saj të pakushtëzuar te Draghi. Edhe senatorët e “Italia al Centro” do të votojnë pro besimit ndaj qeverisë Draghi. Kështu bëri të ditur partia e kryesuar nga Giovanni Toti.

Ndërkohë, “Frattelli d’Italia” të Melonit kanë thënë se duan të hyjnë në zgjedhje të reja pa dhënë një votë pro qeverisë teknike.

“Ne jemi në spektaklin e një mazhorance që është goditur në fytyrë gjatë gjithë debatit: çfarë mund të jetë më pak serioze? Kemi tejkaluar të gjitha kufijtë. Tani mjafton. Le të shkojmë më tej”, tha në Senat Luca Ciriani nga FdI, duke shpjeguar se “nuk do ta votojmë as këtë votëbesim”.

Ndërkohë ish-kryeministri italian Matteo Renzi tha se drejtimi i vendit do të vazhdojë me Dragin.

“Ne do të votojmë për besim, por gjithsesi sot mbaron teatri. Ne themi faleminderit, për fushatën e vaksinimit, për PNRR, për trenin për në Kiev. Sot kjo qeveri vazhdon me Draghin ose shkojmë në shtëpi”, tha Renzi, tashmë kreu i IV, duke folur në Senat.

Edhe fjala e Primo Di Nicolas të Ipf ishte për një fillim të ri që është i mundur.

“Ne duhet të rindërtojmë paktin e besimit që na ka lejuar muajt e fundit t’u japim përgjigje pyetjeve të rëndësishme, siç dëshmohet nga fakti se një mobilizim i tillë i shoqërisë civile nuk është parë kurrë. Ne duam të vazhdojmë ta mbajmë derën hapur. Këtë sezon të ri, një fillim i ri është i mundshëm dhe besoj se mund ta favorizojnë forca të ndryshme, në krahasim me ata që kanë vendosur t’u kthejnë shpinën italianëve”.

“Kjo është arsyeja pse ne do të votojmë po për rezolutën e Casinit”, tha kreu i grupit të partisë “Together for the Future”.

Kryetarja e Senatit, Maria Elisabetta Alberti Casellati pas gjithë këtyre diskutimeve pezulloi seancën dhe thirri krerët e grupeve parlamentare për të marrë një vendim lidhur më kërkesën e Draghit.