Kryetarja e Kuvendit, Lindita Nikolla ka dalë ditën e sotme në një deklaratë për shtyp nga Kryesia e Kuvendit pas letrës së Informimit të marrë nga Autoriteti i Dosjeve në të cilën përmendet ish Presidenti Ilir Meta me dosje të klasifikuara të ish Sigurimit të Shtetit.
Duke quajtur rastin tronditës të një politikani si bashkëpunëtor i Sigurimit të shtetit, Nikolla deklaron se Kuvendi do të ndërhyjë menjëherë. Ajo falenderon Autoritetin e Dosjeve të cilët i kanë dërguar letër dhe kërkesë për ndërhyrje.
Po ashtu, Nikolla tregoi se sot ka mbledhur kryetarët e grupeve parlamentare të cilët i ka informuar për identitetin e politikanit në fjalë, ndërsa shtoi se do të mbledhë Kuvendin në çdo kohë që këto forca politike do të kenë nevojë.
“Për rastin e një politikani, Autoriteti i Dosjeve ka nisur një letër drejt meje, ato kërkojnë ndërhyrje të menjëhershme. Rasti është tronditës, kam thirrur sot kryetarët e grupeve parlamentarë, i kam informuar për letrën dhe për identitetin. Do e mbledh Kuvendin në çdo kohë që forcat politike do të kenë nevojë”, u shpreh Nikolla.
Në letrën e siguruar zbulohet emri ish-Presidenti Ilir Meta, për të cilin thuhet se Autoriteti i Dosjeve ka marrë një denoncim “mbi pastërtinë e figurës së një prej personaliteteve më të lartë të shtetit, siç është ish-presidentit i Republikës, Ilir Metaj, i pajisur me certifikatë të pastërtisë së figurës nga Komisioni Mezini dhe Bezhani, e konfirmuar nga ana jonë me vendimin e autoritetit nr. 17, datë 28.04. 2017, rezulton se në fakt figuron në dokumentet e krijuara nga strukturat e ish-sigurimit të shtetit”.
Discussion about this post