Anëtarët e Këshillit Bashkiak të Vlorës refuzojnë mbledhjen online me kryetarin e Bashkisë Dritan Leli, duke kërkuar mbledhje fizike në teatrin “Petro Marko”.
Në funksion të mbledhjes së njoftuar të Këshillit Bashkiak të Vlorës për ditën e sotme, Sekretari i Këshillit Agron Gjipali ka komunikuar me përfaqësuesit e lartë të Ministrisë së Shëndetësisë. Gjipali ka kërkuar një konfirmim mbi ligjshmërinë e realizimit të mbledhjes fizike në sallën e teatrit “Petro Marko”.
Në përgjigjen e saj, zv.ministrja e Shëndetësisë Mira Rakacolli konfirmon se mbledhja mund të mbahet fizikisht. “Për sa i përket Urdhrit të Ministres së Shëndetësisë ‘Për ndalimin e grumbullimeve në vende të mbyllura apo te hapura’ qëllimi ka qenë ndalimi i grumbullimeve të posaçme, që sikundër përmendet në urdhër lidhet me tubimet, konferencat, mbledhjet partiake, ceremonitë festive etj. ku rreziku i transmetimit të virusit është shumë i lartë. Për sa më sipër ky urdhër nuk cenon aktivitetin e Këshillit Bashkiak, pasi zhvillimi i mbledhjeve është vijimësi e punës së Këshillit Bashkiak, një praktikë që përdoret edhe nga institucione të tjera që punën e tyre e mbështesin mbi organe kolegjiale. Sot Vlora paraqet një situatë epidemiologjike të mirë, pa asnjë rast Covid. Sigurisht, këto mbledhje duhet të zhvillohen në përputhje me protokollet anti-Covid të miratuara si respektimi i distances, mbajtja e maskes, kushtet higjenosanitare etj.”, shkruan Rakacolli në përgjigjen për Gjipalin.
Ndërkohë kryebashkiaku Leli ka zhvilluar mbledhjen online me administratën, por pra praninë e këshilltarëve.
“Përshëndetje të gjithëve, duke ju uruar një ditë të mbarë pune, jam këtu para jush sipas kërkesës së këshilltarëve për të zhvilluar një mbledhje jashtë radhe të cilën e kam prezantuar problematikat për realizimin e një mbledhje të tillë. Doja ta ndaja me ju qytetarë të Vlorës këtë sqarim për shkresën e fundit që i kam çuar kryetares së këshillit bashkiak.
Dua të ndaj me ju dhe një kërkesë të sotme për kryetaren e këshillit bashkiak për t’i kursyer qytetit në këtë kohë një shfaqje të panevojshme”, deklaroi Leli.
