Kryeministri i Kosovës Albin Kurti, pas përfundimit të mbledhjes së Këshillit të Sigurimit, tha se nuk ka asnjë mundësi për destabilizim me fillimin e reciprocitetit në çështjen e letërnjoftimeve dhe targave me Serbinë.
Në një konferencë për mediat ai tha se po punon që nesër gjithçka të shkojë qetë dhe siç duhet dhe theksoi se duke nisur nga nesër serbët që do të hyjnë në Kosovë thjesht do të kenë një dokument më shumë.
“Unë jam kryeministër i progresit dhe i shpresës. E di që në fqinjin tonë verior, në skenën politike atje ka shumë politikanë e zyrtarë deri te kreu shtetëror që janë udhëheqës të frikës e frikësimit. Unë besoj që paqja, demokracia, sundimi i ligjit, Republika, kushtetutshmëria nuk kanë alternativë, andaj edhe uroj, besoj dhe punoj që nesër gjithçka të shkojë në mënyrë të qetë. Ne nuk do t’ua marrim dokumentet njerëzve që vijnë nga Serbia në Kosovë. Ne do t’ua shtojmë një fletë-deklarim. Pra, ata vijnë me dokumentet e lëshuara nga Serbia. Ne nuk ua marrim ato. Ne ua lëshojmë një fletë-deklarim sepse ka 11 vjet që Serbia vepron njësoj me çdo qytetar të Republikës sonë kur e kalon kufirin dhe shkon në Serbi. Pra, nga nesër, ata do të kenë një dokument më shumë, jo më pak”, tha Kurti.
Kryeministri theksoi se beson se nesër gjithçka do të shkojë shumë më mirë dhe nuk ka hapësira për tensione apo konflikte mes qytetarëve serbë autoriteteve vendase.
Discussion about this post