Është arrestuar ditën e sotme në Qafë-Botë biznesmeni Behar Muçobega, pasi ishte shpallur në kërkim që nga 1 qershori. Ai akuzohet për “falsifikim dokumentesh”, dyshohet si një nga përfituesit e një pjese të truallit. Brenda pak orësh nga ndalimi, Muçobega ka dalë para Gjykatës së Sarandës, ku ndaj tij gjyqtari Shkelzen Liçaj ka vendosur masën e sigurisë “Arrest në shtëpi”.
Kujtojmë se, nga operacioni i 1 qershorit u arrestuan 6 persona dhe u shpallën në kërkim 3. Gjykata liroi 5 nga të arrestuarit duke vendosur masën e sigurisë “Arrest në shtëpi” ndërsa në burg ka ngelur vetëm noteri Aleko Anagnosti. Në kërkim vazhdon të jetë ish-Drejtori i ASHK Sarandë Ardian Kola si dhe biznesmeni Bedri Muçobega, vëllai i të ndaluarit të sotëm.
Pas operacioneve të prokurorisë, dy nga zyrtarët që aktualisht ndodhen në burg, u sulmuan edhe nga elemente kriminale. Zyrës noteriale të Aleko Anagnostit iu vu zjarr 5 ditë pas arrestimit të tij, ndërkohë që automjeti i ish-juristit të ASHK Sarandë Laert Pasha u sulmua pak ditë më parë duke iu thyer xhami, çarë gomat e lyer me sprajt.
Discussion about this post