Presidenti i KOKSH-it në Shqipëri, Fidel Ylli i kërkoi kryeministrit Edi Rama që të hapë kompanitë e basteve në vendin tonë në mënyrë që të ardhurat që qarkullojnë nga ky aktivitet në mënyrë të paligjshme të shërbejnë për sportistët.
“Ne duam që fëmijët të largohen nga veset e këqija, nga duhani dhe droga. Do të kemi një vend që të krenohemi. Sepse është ulur shumë lindja sot. Duam që të rinjtë të mos largohen nga vendi por të qëndrojnë këtu. Unë jam i pakënaqur përsëri. Do të lutesha zoti kryeministër, nxirri nga errësira kompanitë e basteve që po gëlojnë. Që me ato para të bëjmë një qendër tjetër olimpike. Për të bërë dhe shumë qytete të tjera të Shqipërisë. Ne nuk mund të kërkojmë lëmoshë të buxhetit të shtetit. Unë kam qenë në parlament dhe e di si ndahet buxheti i shtetit. Por ne kërkojmë burime të tjera alternative që i merr sot errësira. U bë mirë që u mbyllën sepse kam qenë në parlament dhe e kam votuar. Ishin bërë si kërpurdha pas shiut. Por ka ardhur një moment që duhet bërë një studim. Kompani bastesh ka e gjithë bota e qytetëruar. Po ne kaq të pasur jemi që i lëmë këto para në rrugë. Ne nuk mund të rrimë me atë pallat sporti që kemi sot. Duhet bërë një pallat modern. Duhet bërë fusha olimpike në të gjithë Shqipërinë dhe ju do shikoni në fund të vitit tjetër se çfarë efekti do të ketë”, tha Fidel Ylli.
Ai u shpreh se meritat për fitoren e Luiza Gegës nuk i ka vetëm ajo si sportiste, por edhe trajneri i saj dhe autoritetet përgjegjëse që e ndihmuan financiarisht në mënyrë që të stërvitej.
“Kjo punë nuk është bërë vetëm nga Luiza. Por edhe nga trajneri i talentuar që është Taulanti. Është pjesë edhe ministria përgjegjëse për sportin dhe Bashkia e Tiranës që i kanë krijuar asaj kushte të mira për t’u stërvitur në Dardhë, në pistën e Korçës edhe në Kenyia. Sepse atje ka një lartësi 3200 metra. Sepse shkenca thotë nëse stërvitesh në lartësi të tilla krijohet dopping artificial. Luiza ka treguar performancë të jashtëzakonshme. Kryeministri ka vendosur një standard që nderojnë Shqipërinë duhet të priten gjithmonë në këtë mënyrë. Sepse sportistët janë ambasadorët më të mirë të Shqipërisë. Kemi nisur një rrugë të përbashkët duke bërë disa ligje të mira në parlament. Ecuria e Luizës është edhe falë këtyre ligjeve. Sportistët shqiptarë nuk marrin më rrugët për të ikur jashtë vendit. Ne nuk kërkojmë lëmoshë. Ne e duam qeverinë partner. Nuk duam të bëjmë grevë. Kam parë mediokritete të ndryshme këto ditë në rrjetet sociale. Një pjesë që nuk ka qenë kurrë në stadium dhe nuk e dinë se çfarë ka bërë kjo qeveri. Harruan stadiumin e Elbasanit. Të Kukësit. Qendrën olimpike të Korçës. Sot federatat janë në zyra modern. Dhe vjen presidenti olimpik botëror për të inauguruar zyrat. Sepse qeveria e mendon sportin si cilësi jete, si diplomaci dhe turizëm. Holandezët që e mendonin Shqipëri si një vend që mbjell kanabis erdhën dhe ikën me një mendje tjetër”, deklaroi ai.
Discussion about this post