Mikhail Zorin, 24-vjeçari rus që është vënë në pranga në uzinën e Gramshit pas incidentit me ushtarët shqiptarë ka nënën pjesë të ushtrisë ruse. Mësohet se vetë rusi ka rrëfyer se e ëma është ende aktive në ushtrinë e Vladimir Putin, ndërsa i ati është me profesion avokat.
Ai është futur brenda Shqipërisë me biçikletë përmes pikës kufitare të Muriqanit. Në momentin që është vënë në pranga ai ka pasur vetëm 1 mijë dollarë me vete.
Zorin bashkë me dy të tjerët, 33-vjeçaren Svetlana Timofoeva dhe ukrainasin Fiodor Mihailoviç ka dalë para Gjykatës së Elbasanit ku do të njihet me masën e sigurisë. Prokuroria ka kërkuar arrest me burg për tre të arrestuarit. Akuzat që rëndojnë mbi ta janë “Dhënia e informatave sekrete”, dhe “Sigurimi i informatave” dhe rrezikojnë nga 3-10 vite burg.
Ata u shoqëruan nga policia mbrëmjen e 20 gushtit teksa tentuan të hynin në ish-uzinën e armëve në Gramsh. Rusi Zorin u përlesh me ushtarakët që ruanin objektin të cilët nuk e lejuan të hynte uzinë, duke i sulmuar edhe me një spraj neuroparalizues. Në dëshminë e tyre në polici pas arrestimit, ata kanë thënë se janë blogerë dhe fotografonin kryesisht territore ushtarake që janë të braktisura dhe nuk përdoreshin më nga shteti.
Discussion about this post