Vendi ynë nuk po gjen qetësi, pas përplasjes me armë në Dibër, një tjetër ngjarje raportohet në Vlorë. Bëhet me dije se rreth orës 19:40, në lagjen “Partizani”, është kryer një atentat ndaj dy punonjësve të policisë. Sipas të dhënave të policisë, nga një automjet tip “Volkswagen”, një shtetas ende i paidentifikuar, ka qëlluar me armë zjarri në drejtim të automjetit tip “Audi” me të cilin udhëtonin shtetasit A. Bedinaj, me detyrë punonjës i Patrullës së Përgjithshme në Komisariatin e Policisë Vlorë dhe N. M., me detyrë punonjës i Policisë Kufitare Sarandë. Fatmirësisht asnjë prej efektivëve nuk ka pasur lëndime.
Mësohet se në momentin e ngjarjes, punonjësit e Policë kanë qenë jashtë shërbimit, duke udhëtuar me automjet privat. Nuk dihen shkaqet e kësaj ngjarje, por grupi hetimor ndodhet në vendngjarje dhe po punon për zbardhjen e plotë të rrethanave të ngjarjes, identifikimin dhe kapjen e autorit.
Discussion about this post