Prokurori i Përgjithshëm i shtetit të Nju Jorkut ngriti një padi gjithëpërfshirëse të mërkurën kundër ish-presidentit Donald Trump, tre prej fëmijëve të tij të rritur dhe Organizatës Trump, duke pretenduar se ata ishin të përfshirë në një mashtrim të gjerë që zgjati mbi një dekadë që ish-Presidenti e përdori për të pasuruar veten.
Në padinë prej më shumë se 200 faqesh, Prokurorja e Përgjithshme Letitia James, një demokrate, pretendon se mashtrimi preku të gjitha aspektet e biznesit Trump, duke përfshirë pronat e tij dhe fushat e golfit. Sipas padisë, Organizata Trump mashtroi huadhënësit, siguruesit dhe autoritetet tatimore duke fryrë vlerën e pronave të tij duke përdorur vlerësime mashtruese.
“Këto akte mashtrimi dhe keqinterpretimi ishin të ngjashme në natyrë, u kryen nga menaxhmenti i lartë në Organizatën Trump si pjesë e një përpjekjeje të përbashkët për çdo deklaratë vjetore dhe u miratuan në nivelet më të larta të Organizatës Trump – duke përfshirë edhe vetë zotin Trump”, thuhet në padi.
Trump dhe fëmijët e tij, Donald Trump Jr., Eric Trump dhe Ivanka Trump, përmenden si të pandehur në padi. Emërohen gjithashtu Allen Ueisselberg, ish-CFO për Organizatën Trump, dhe Jeff McConney, një tjetër ekzekutiv i kompanisë për një kohë të gjatë.
James tha se ajo beson se ligjet shtetërore dhe penale mund të jenë shkelur dhe ia referoi çështjen zyrës së avokatit amerikan për Distriktin Jugor të Nju Jorkut dhe Shërbimit të të Ardhurave të Brendshme.
James po kërkon 250 milionë dollarë fonde të supozuara të marra në mënyrë të paligjshme dhe për të ndaluar përgjithmonë Trump dhe fëmijët e përmendur në padi të shërbejnë si drejtor i një biznesi të regjistruar në shtetin e Nju Jorkut. Ajo po kërkon gjithashtu të anulojë certifikatën e korporatës së Organizatës Trump, e cila, nëse jepet nga një gjyqtar, mund ta detyrojë në mënyrë efektive kompaninë të ndërpresë operacionet në shtetin e Nju Jorkut.
Trump më parë e quajti James një “prokuror renegat” për të cilin tha se po drejton një “ekspeditë peshkimi hakmarrëse dhe egoiste”. Organizata Trump i quajti akuzat e saj të mëparshme “të pabaza” dhe mohoi çdo keqbërje.
Padia civile vjen pasi Trump është nën presionin ligjor në rritje pasi prokurorët po ndërmarrin hapa hetimorë që afrohen gjithnjë e më shumë me rrethin e tij të brendshëm.
Trump po përballet me hetime të shumta penale nga prokurorët federalë dhe shtetërorë që përfshijnë saktësinë e pasqyrave financiare të kompanisë së tij, ndërhyrjen në zgjedhjet presidenciale të vitit 2020 dhe trajtimin e dokumenteve të klasifikuara pas largimit nga detyra. Trump ka mohuar çdo keqbërje.
Hetimi 3-vjeçar
Njoftimi është zhvillimi i fundit në atë që ka qenë një hetim tre-vjeçar i udhëhequr nga James për financat e Organizatës Trump.
Në janar, zyra e James tha se gjeti prova “të rëndësishme” që tregojnë se Organizata Trump përdori vlerësime të rreme ose mashtruese të aseteve në pasqyrat e saj financiare për të marrë kredi, sigurime dhe përfitime tatimore. Muajin pasues, firma e kontabilitetit për një kohë të gjatë të Trump dha dorëheqjen.
James nisi hetimin e saj në vitin 2019 pasi ish-avokati personal i Trump, Michael Cohen dëshmoi para Kongresit duke pretenduar se Trump frynte vlerën e aseteve të caktuara për të marrë kredi dhe sigurime dhe nënvlerësoi të tjerët për të përfituar përfitime tatimore.
Përveç padisë së re për mashtrim, Organizata Trump do të dalë në gjyq muajin e ardhshëm me akuzat se ishte e përfshirë në një skemë 15-vjeçare të mashtrimit tatimor dhe shefi financiar i saj për një kohë të gjatë ka pranuar të dëshmojë kundër kompanisë.
Ueisselberg, i cili shërbeu si drejtor financiar në Organizatën Trump për dekada, u deklarua fajtor në gusht për rolin e tij në një skemë 15-vjeçare të mashtrimit tatimor dhe si pjesë e marrëveshjes, ai kishte rënë dakord të dëshmonte kundër kompanisë së pasurive të paluajtshme të Trump në gjyq.
Në javët e fundit, Organizata Trump kishte ofruar zgjidhje për të shmangur padinë edhe pse ata mohuan çdo keqbërje, por zyra e James e bëri të qartë se nuk ishte e interesuar për një marrëveshje, thanë njerëz të njohur me këtë çështje.
Discussion about this post