Mbledhja e sotme e Komisionit të Ligjeve është shoqëruar sërish me debate pasi ministrja e Ekonomisë Delina Ibrahimaj nuk kishte sjellë as sot në komision paketën fiskale, por nisi me diskutimet për buxhetin e vitit të ardhshëm.
Deputetja demokrate Jorida Tabaku reagoi e revoltuar se një gjë e tillë nuk kishte ndodhur as në kohën kur në krye të Kuvendit ishte Gramoz Ruçit apo Jozefina Topalli, ndërsa i kërkoi dhe njëherë ministres që të sillte paketën fiskale në komision.
“Do kisha dashur që argumentet tona t’i përdornim për të diskutuar, ndërkohë që ne sot nuk kemi as luksin për të folur. Komisioni i Ekonomisë dhe i Financave nuk e ka ende të plotë, kanë ardhur vetëm tre ligje, ndërsa tre ligjet që kanë një efekt prej 100 milionë eurosh nuk kanë ardhur. Nuk e kemi paketën e plotë fiskale në asnjë fletë. Nuk ndahet buxheti i shtetit dhe projektligjet financiare, këto gjenerojnë efekte financiare që janë reflektuar në buxhet, kush është miratuar një ligj për lojërat e fatit, ne nuk mund të diskutojmë në ajër. Kurdo që ta ketë të nevojshme qeveria, të vijë dhe të diskutojmë, nuk mund të diskutojmë kështu, s’na bëni dot për budallenj. Pas anulimit të mbledhjes së djeshme, unë besoj që sot ne duhet të marrim ligjet e paketës fiskale, t’i lexojmë ato dhe të diskutojmë siç thotë rregullorja e këtij parlamenti. Kam 24 orë që përpiqem. E kuptoj që kemi një arrogancë që vjen nga pushteti, por për 30 vite nuk ka ndodhur kurrë që të vijmë këtu, si nën drejtimin e Jozefina Topallit apo edhe të Gramoz Ruçit, të vijmë dhe të diskutojmë në këtë mënyrë. Kur të ketë koha ministrja të vijmë të diskutojmë sërish”, tha Tabaku.
Discussion about this post