Keqtrajtimi i të moshuarës në një azil në Pejë ka sjellë reagime të ashpra në rradhët e opinionit publik.
Ajo ra pre e dhunës nga dy infermiere. Edhe pse tre persona janë në burg tashmë për ngjarjen, siç duket ky nuk ka qenë një rast i izoluar.
Prokurori i Prokurorisë së Pejës Dorian Juniku, ka bërë të ditur se prokuroria ka informacione se në këtë Qendër mund të ketë raste të tjera të dhunës, përveç asaj që u raportua gjatë ditës së djeshme.
Juniku theksoi se prokuroria është ende në fazën hetimore, dhe se nuk do të ndalen derisa ky rast të zbardhet.
“Jemi në fazën fillestare hetimore, që në fund të kompletojmë rastin dhe të kemi një pasqyre të qartë se çfarë ka ndodhur, nuk do të ndalemi deri sa të sqarohet i gjithë rasti. Është autorizuar policia, që të vazhdojë edhe të personelit, por edhe të tjerëve që janë vendosur aty. Kemi dyshime që këto raste mund të kenë ndodhur edhe më herët”, ka vijuar ai.
Për këtë rast janë arrestuar tre persona. Aurona Pelaj, e dyshuara kryesore e cila shihet në video derisa e godet gruan e moshuar, në polici ka deklaruar se ka qenë duke u vetëmbrojtur.
Discussion about this post