Edith Harxhi padit në Gjykatën e Tiranës Lulzim Bashën

Anëtarja e kryesisë së PD, Edith Harxhi ka dorëzuar në Gjykatën e Tiranës padi për ish-kreun e demokratëve Lulzim Bashën.

Në një dalje për mediat nga Gjykata, Harxhi tha se ka kërkuar çregjistrimin e Lulzim Bashës si kryetar i PD nga regjistri i partive politike pas dorëheqjes së tij.

Lexo edhe: Shpërthim me eksploziv në një lokal në Përrenjas

Ajo tha se kërkesa e saj u pranua dhe do të ketë një seancë tjetër për këtë çështje. Më herët ajo ka drejtuar akuza ndaj Bashës, duke thënë se ai dhe PD gjatë kohës kur ishte nën drejtimin e tij janë marrë peng.

“Kam mbaruar një nga seancat gjyqësore për padinë që i kam drejtuar gjykatës së Tiranës për pavlefshmërinë e zgjedhjeve të PD për kryetar, më 13 qershor. Sot kërkova ndryshimin e objekt padisë, çregjistrimin e Lulzim Bashës si kryetar nga regjistri i partive politike të Gjykatës. Kjo u pranua sot nga gjyqtari dhe seanca tjetër vijon. Deri sot nuk ka pasur seancë normale. Kërkesa do të merret në shqyrtim, seanca do vijojë më tej pas disa javësh”, tha Harxhi.