Vasil Bedinaj, kryetari i Operatorëve Turistikë në Vlorë ka përshëndetur vendimin e kryeministrit Edi Rama për të zgjatur me 60 minuta orarin e lejuar për muzikën. Në një lidhje telefonike për “Report Tv”, Bedinaj deklaroi se reagimi i kryeministrit ishte tejet pozitiv dhe shtoi se protesta e parashikuar për në orën 19:30 është anuluar.
“Përshëndesim edhe vendimin e kryeministrit për zgjatjen e orarit. Ka qenë një gjë që sektori ynë, pas shumë diskutimeve, kemi dalë në përfundimin që duhej bërë kjo gjë., Vlora është një qytet turistik dhe pas një viti shumë të vështirë qoftë për ne dhe qeverinë, por në asnjë moment nuk e ka mbështetur biznesin. Për shmangur falimentimin e subjekteve, duhej kjo gjë. Do të ishte më e udhës që qeveria të detyronte qytetarët të bënin vaksinën në mënyrë që të ecte ekonomia. Reagimi i kryeministrit ishte shumë pozitiv, erdhi në momentin e duhur sepse situata po përkeqësohej, ishte organizuar një protestë më masive në orën 19″30, ne po e heqim këtë si opsion dhe falënderojmë kryeministrin që e zgjidhi këtë ngërç. Jemi ok me këtë njoftim që morëm nga kryeministri”, tha ai.
Më herët, kryeministri Edi Rama njoftoi heqjen e orës policore në të gjitha zonat turistike dhe jo vetëm, por aty ku qytetarët duan të festojnë me muzikë. Rama tha se nga 20 korriku muzika do të ndalohet pas orës 23:00, duke e zgjatur automatikisht me 1 orë nga aktualisht që është 22:00. Deri më tani, ora policore është kundërshtuar nga bizneset në Vlorë, Shëngjin e Sarandë.
