Platforma e Artit Bashkëkohor, Harabel në bashkëpunim me ambasadën italiane në Tiranë, organizoi ditën e djeshme çeljen e ekspozitës “I Veggenti”.

Punimet e paraqitura në këtë ekspozitë vinin nga artistët Andrea Anastasio dhe Patrick Tuttofuoco dhe të kuruara nga Davide Quadrio dhe Ajola Xoxa.

Duke ardhur prej brezash dhe praktikash artistike të ndryshme, Tuttofuoco dhe Anastasio kanë paraqitur punimet e tyre vetjake, por edhe të përbashkëta dhe bënë të mundur që dy kulturat e dy vendeve të takoheshin së bashku në Tiranë.

Patrick Tuttofuoco prej shumë vitesh punon duke krijuar punë që lidhin vendet historike të zonës me pop kulturën bashkëkohore. Ai synon së tepërmi instalacione monumentale, arkitekturën, krijime enigmatike dhe totemike çka e ngacmon publikun dume marrë më pas edhe reagime të forta.

Ndërsa artisti tjetër Andrea Anastasio punon me mediume në fushën e dizajn-it, arkitekturës dhe artit pamor. Në punët e tij më së shumti gjen vend nënkuptimi filozofik. Ai synon gjithashtu të sjelli truke vizuale duke mar më pas emocionin apo efektin që shkaktohet nga punët e tij.

Ekspozita “I VEGGENTI” është pritur shumë nga ambasadori i Italisë në Shqipëri, Fabrizio Bucci duke theksuar se shënjon një kapitull të ri në marrëdhënien kulturore mes Italisë dhe Shqipërisë.

Në fjalën e tij ambasadori është shprehur se “ky projekt vendos një bashkëpunim të ri në artin bashkëkohor midis dy vendeve tona. Një rrugëtim zbulimi, krijimtarie dhe bashkëndarjeje, sjellë në Shqipëri nga dy artistë të mëdhenj italianë. Punimet e tyre, të rrëfyera nga përvoja njëzetvjeçare e Davide Quadrio dhe të realizuara falë bashkëpunimit të frytshëm me Harabel, jam i sigurt se do të ndihmojnë për të forcuar vlerën e artit publik në Tiranë dhe për të paraqitur në një mënyrë të re lidhjen midis historisë, mitologjisë dhe bashkëkohësisë shqiptare”.

Ndërsa kuratorja dhe njëkohësisht edhe themeluesja e Harabel, Ariola Xoxa u shpreh se “Harabel e konsideron “I VEGGENTI” jo vetëm si një mundësi për të prezantuar para publikut shqiptar mendimin artistik provokues dhe ironik, të sjellë nga artistët Patrick Tuttofuoco dhe Andrea Anastasio përmes një ekspozite të ngritur në një vilë të vjetër, që shërbeu si shtëpi e nomenklaturës komuniste para vitit 1991, por edhe një ndërhyrje të freskët dhe tunduese në qytet, që do të lërë pas jehonën e saj përmes dy instalimeve të artit publik, të cilat do të ekspozohen përgjithmonë”.

“Capo d’Arte, një shoqatë kulturore jofitimprurëse në Salento e angazhuar në përhapjen e artit bashkëkohor, është krenare që promovon një projekt për të rritur ndërgjegjësimin mbi përsosmërinë e artit bashkëkohor italian jashtë vendit, duke na lejuar kështu të shohim peizazhe artistike të panjohura dhe të eksplorojmë botë të ndryshme krijuese në dy vende aq afër sa Shqipëria dhe Italia “, thotë Francesca Bonomo, themeluese e Capo d’Arte.

“Ardhja nga Italia dhe takimi me një kulturë kaq të pasur dhe shumështresëshe, që ka aq shumë për t’i dhënë anës tjetër të detit Adriatik, ishte një udhëtim me të vërtetë i papritur dhe një zbulim që hap një rrugë afatgjatë të kërkimit dhe bashkëpunimit”, tha Davide Quadrio, bashkëkurator i ekspozitës dhe themelues i Arthub.