Detaje të reja tronditëse kanë dalë lidhur me krimin e dyfishtë në Shkodër mbrëmjen e djeshme. Mësohet se dëshmitar i kësaj ngjarjeje ka qenë edhe komshiu i çiftit i cili ka dëgjuar të shtënat me armë zjarri, ndërsa nga ballkoni i tij i banesës kishte konstatuar shenja gjaku. Kjo e fundit përforcon dyshimin se një ditë para ngjarjes e moshuara Sanije Badulla është dhunuar barbarisht nga bashkëshorti i saj, i cili më pas ka qëlluar për vdekje edhe veten.
Për tri ditë me radhë dy trupat e pajetë qëndruan brenda shtëpisë në lagjen “Ahmet Haxhija”, ndërsa askush nuk mori guximin që t’i trokiste në derë apo të njoftonte policinë.
Vetëm pas tri ditësh, pasi trupat janë dekompozuar dhe nisën të lëshojnë një erë të rëndë ,si shkak edhe i temperaturave të larta, një prej komshinjve ka parë nga lartësia prej banesës së tij shtetasen Sanije Bandula të shtrirë në tokë dhe oborrin plot me gjak. Vetëm në atë moment, ky komshi ka njoftuar policinë, duke i treguar për skenën makabër që kishte përjetuar dhe më pas efektivët kanë mbërritur në vendngjarje, duke konstatuar trupin e pajetë të 83-vjeçares në oborrin e shtëpisë dhe pak më tutje brenda banesës edhe 79-vjeçarin, që qëlloi veten, pasi kishte vrarë bashkëshorten.
