Takim i radhës mbi vijimin e dialogut Kosovë-Serbi do të mbahet rreth datës 7 dhe 8 shtator në Bruksel.
Lajmi është bërë me dije nga burimet diplomatike në Bruksel, duke thënë se ende nuk është caktuar agjenda e bisedimeve.
“Pata diskutime përmbajtjesore, të ndara, me zëvendëskryeministrin e parë të Kosovës, Besnik Bislimi, dhe me drejtorin e Zyrës së Serbisë për Kosovën, Petar Petkoviq, rreth përgatitjeve për takimin e radhës në nivel të kryenegociatorëve”, ka shkruar Lajçak në Twitter.
Kështu, delegacionin e Kosovës do ta kryesojë zëvendëskryeministri i parë, Besnik Bislimi, ndërsa atë të Serbisë drejtori i Zyrës për Kosovën në Qeverinë e Serbisë, Petar Petkoviq.
Takimi i fundit rreth dialogut Kosovë – Serbi është zhvilluar më 19 korrik, por pa rezultate pas akuzave të ndërsjella midis presidentit serb, Aleksandër Vuçiç dhe kryeministrit kosovar, Albin Kurti.
