Presidenti amerikan, Joe Biden ka mbrojtur vendimin e tij për të tërhequr trupat amerikane nga Afganistani, një veprim që çoi në kthimin e militantëve talebanë në pushtet.
“Unë nuk do ta zgjas këtë luftë përgjithmonë, lufta në Afganistan tani ka përfunduar,”-tha Biden.
Biden në një fjalim drejtuar kombit, një ditë pas përfundimit të një pranie 20-vjeçare amerikane në Afganistan, vlerësoi trupat për organizimin e një transporti ajror të më shumë se 120,000 njerëzve që u larguan nga regjimi taleban.
Trupat e udhëhequra nga SHBA shkuan në Afganistan në 2001, duke dëbuar talebanët pas sulmeve shkatërruese të 11 Shtatorit, për të cilat fajësohet Al-Kaeda-një grup xhihadist militant i bazuar atëherë në vendin aziatik.
Militantët talebanë ishin në gjendje të rimarrin kontrollin mbi të gjithë vendin brenda 11 ditëve, më në fund duke hyrë në kryeqytetin, Kabul, më 15 gusht. Presidenti Biden vendosi gati 6,000 trupa për të marrë kontrollin e aeroportit për të koordinuar evakuimin e shtetasve të huaj amerikanë dhe afganëve lokalë që kishin punuar për ta.
