Një tjetër operacion është zhvilluar sot nga forcat policore në Lezhë, teksa në pranga kanë rënë tre persona e precedent kriminal. Në kuadër të aksionit të koduar “Shëngjin” është bërë arrestimi në flagrancë i S. Gj., 27 vjeç, me precedentë të mëparshëm kriminal në fushën e narkotikëve dhe të armëmbajtjes pa leje; L. F., 17 vjeç dhe K. N., 16 vjeç, banues në Shëngjin, Lezhë.
Policia jep detaje se pas një hetimi disa javor, uniformat blu kanë ushtruar kontroll në ambientin ku këta persona, në bashkëpunim me njëri-tjetrin, përgatisnin lëndën narkotike në doza, për shitje.
Gjatë kontrollit të ushtruar në këtë ambient u gjetën dhe u sekuestruan në cilësinë e provës materiale doza më lëndë narkotike të dyshuar kokainë, një sasi lënde narkotike cannabis, armë zjarri pistoletë, municion luftarak, peshore elektronike, një sasi lekësh të dyshuara të përftuara nga ky aktivitet i paligjshëm dhe një automjet.
