Mbrëmjen e së dielës Shqipëria fitoi me rezultatin 1-0 ndeshjen kualifikuese të Botërorit ‘Qatar 2022’ ndaj Hungarisë.
Kuqezinjtë bënë një lojë shumë të bukur ku pjesën e parë thuajse nuk ia lanë fare topin kundërshtarëve, ndërsa pjesa e dytë e takimit ishte ajo që do të sillte fitoren, me Armando Brojën që u fut në lojë në minutën e 80-të dhe arriti të shënojë në të 87-ën.
Portieri i Kombëtares hungareze, Denes Dibusz që hyri në fushë në pjesën e dytë në vend të Gulacsi foli për mediat në Hungari dhe e pranoi që Shqipëria e meritoi fitoren. 30-vjeçari foli për momentin kur pësoi gol duke theksuar se reagoi me vonesë pasi nuk kishte edhe shumë pamje të qartë.
“Fatkeqësisht, ne nuk arritëm ta mbyllnim ndeshjen pa pësuar gol. Goditja e sulmuesit të Shqipërisë erdhi e shkurtër, e pashë topin në momentin e fundit dhe reagova me vonesë pasi kishte lojtarë të tjerë përpara.
Është një rezultat shumë i dhimbshëm, por ne nuk do të ishim shumë përpara me një barazim. Bazuar në këtë, madje më duhet të them se ata fituan me meritë, edhe pse është shumë e vështirë të thuhet “,-tha gardiani i portës hungareze./Gijotina.com
