Vazhdojnë hetimet për Marigona Osmanin, 18-vjeçaren nga Ferizaj, e cila u la pa shenja jete në hyrje të spitalit nga bashkëjetuesi i saj dhe një person tjetër, pasi e kishin dhunuar për dy ditë me radhë.
Avokati i familjes së të ndjerës, Gazmend Rexhepi, ka thënë për ABCnews se prokuroria po heton nëse të dy të rinjtë e kanë dhunuar Marigonën, apo vetëm bashkëshorti Dardan Krivaqa.
“Në këtë çështje, prokuroria akuzon dy persona për vrasje të rëndë në bashkëpunim. Tani po vazhdojnë hetimet dhe janë marrë të gjitha kamerat për të parë si qëndron e vërteta.
Fillimisht, ai ka thënë se ka qenë aty rastësisht, mirëpo certifikata e vdekjes vërteton se ka qenë vdekje e dhunshme dhe Marigona ka përjetuar dhunë fizike dhe psiqike”.
Sipas avokatit, fqinjët kanë dëgjuar vazhdimisht zhurmë në momentin e dhunës, por nuk kanë reaguar, ndërsa shton se dy ditë para vdekjes, bashkëshorti i ka ndërprerë Marigonës marrëdhëniet me familjen.
“Kohë pas kohe ka pasur të vjella gjaku, por fqinjët nuk kanë dashur të ndërhyjnë në marrëdhënien e një çifti. Dy ditë para vdekjes, vajzës i është ndërprerë çdo kontakt me familjen dhe kjo ka bërë të gjithë të shqetësohen”, ka thënë avokati.
Ngjarja e rëndë ndodhi disa ditë më parë, ndërsa policia ka arrestuar dy personat e dyshuar për vrasjen, përfshirë këtu edhe bashkëshortin e saj, Dardan Krivaqa.
