Mbi 53 mijë doza të vaksinave Pfizer kanë mbërritur ditën e hënë në Kosovë, si rrjedhojë e kontratës që Ministria e Shëndetësisë ka nënshkruar me këtë kompani.
Sipas të dhënave të fundit nga kjo ministri, numri total i vaksinave të injektuara në Kosovë është 1.073.406. Ndërkohë, numri i të vaksinuarve me dozën e parë është 327 mijë e 264, ndërsa me të dyja dozat është 373 mijë e 071.
14 persona kanë humbur jetën nga Covid-19 ditën e djeshme ku vihet re një ulje e numrit të viktimave krahasuar me ditët e kaluara.
Qeveria e Kosovës zhvilloi ditën e hënë një mbledhje online lidhur me prezantimin e masave të reja. Në vendim thuhet se në institucionet publike dhe private, deri me datë 26 shtator 2021, paraqitja në punë do të jetë vetëm e stafit esencial, ndërsa pjesa tjetër do të punojnë nga shtëpia.
Ndërkohë që fillimi i mësimit është shtyrë për dy javë dhe pritet të fillojë më 27 Shtator, por ende nuk është vendosur nëse do të zhvillohet online apo në auditore.
Në vendim thuhet edhe se të gjithë ata persona që hyjnë në territorin e Kosovës duhet të posedojnë një nga dëshmitë e mëposhtme: Certifikatën e vaksinimit për vaksinimin e plotë ose marrjen e një dozë të vaksinës kundër Covid-19, Testi RT-PCR negativ për Covid-19, jo më i vjetër se 72 orë, dhe dëshmi se personi ka kaluar Covid-19.
