Operatori i Shpërndarjes së Energjisë Elektrike ka raportuar pranë Entit Rregullator të energjisë se shpërndarja e energjisë nuk është në parametrat e duhur, sepse kabinat nuk mirëmbahen. Në një dokument të publikuar pranë ERE, Operatori sqaron se kjo ndodh për shkak se kabinat janë private dhe përgjegjësit i neglizhojnë.
Sipas të dhënave, bëhet fjalë për ato kabina në rrjetin 6-10kv që përbëjnë 57 për qind të kabinave totale në rrjet. Sipas OSHEE më shumë se gjysma e këtyre kabinave nuk janë në pronësi të saj e për këtë arsye kompania nuk mund të kryejë investime.
“Kabinat private të lidhura në rrjet zënë rreth 51 % të numrit total të kabinave. Përdoruesit private të këtyre kabinave nuk i mirëmbajnë, operojnë dhe shfrytëzojnë këto kabina sipas kërkesave të Kodit të Shpërndarjes të Energjisë Elektrike duke provokuar ndërprerje, avari në rrjet, vonesa në rikthimin e energjisë, shkallë të ulët sigurie gjatë operimit. Përdoruesit e rrjetit të lidhur ndër vite deri 2013 nuk kanë plotësuar standardet e kërkuara të OSSH në pikën e lidhjes duke operuar me pajisje të cilat për më tepër nuk i nënshtrohen asnjë remonti” thuhet në dokument.
Ndërsa në zona më të thella dhe territor të vështirë shpërndarja e energjisë është në cilësi akoma më dobët. Kjo ndodh për shkak se, disa linja janë ndërtuar nga vetë banorët dhe janë jashtë kushteve teknike. Duke qenë pjesë integrale e rrjetit ato shpesh provokojnë ndërprerje dhe avari në rrjetin shpërndarjes.
