Presidenti rus Vladimir Putin ka njoftuar se do të karantinohet për disa ditë pas lajmit se disa nga anëtarët e kabinetit të tij janë infektuar me Covid-19.
Zëdhënësi i Kremlinit, Dmitry Peskov u tha gazetarëve se Putini kishte qenë në kontakt me disa persona të cilët ishin sëmurë me koronavirus.
“Sigurisht që ne e dimë se kush është sëmurë në rrethin e presidentit dhe izolimi nuk ndikon drejtpërdrejt në punën e presidentit. Por vetëm se takimet personale nuk do të zhvillohen për njëfarë kohë,” tha Peskov.
Megjithatë Kremlini zyrtar ka bërë të ditur se Putin është i shëndetshëm dhe nuk është i infektuar.
Presidenti rus nuk do të udhëtojë në Taxhikistan këtë javë për të marrë pjesë në takimet e sigurisë, por do të marrë pjesë në një telekonferencë, tha Kremlini.
Putin është i vaksinuar me të dyja dozat e vaksinës ruse Sputnik V. Gazetarët që marrin pjesë në eventet ku ai është prezent duhet t’i nënshtrohen testeve të shumta PCR dhe njerëzit që takon u kërkohet të karantinohen paraprakisht dhe të testohen.
