Kompanitë e ndërtimit paralajmërojnë rritje të çmimit të banesave deri në fund të këtij viti. Nga qershori në gusht, të dhënat e INSTAT tregojnë se çmimi i banesave është rritur me 4.2%. Por, për ndërtuesit ky trend rritës do vijojë edhe në tre muajt e fundit të vitit.
Gjatë një interviste televizive, Arben Dervishaj, nënkryetar i Shoqatës së Ndërtuesve, u shpreh se çmimet për blerjen e banesave janë rritur sepse janë shtrenjtuar kostot për ndërtimin e tyre. Sipas tij, duke filluar që nga viti i shkuar çmimi i truallit ka ardhur në rritje, po ashtu edhe çmimet e materialeve të ndërtimit.
“Çmimet rriten për dy arsye: e para sepse pronarët kanë arritur në maksimumin, ka raste që përqindja e pronarëve të truallit shkon edhe 50% dhe shteti ka rritur barrën e taksave mbi ndërtuesit, së fundmi 3% e sipërfaqes kalon në favor të bashkisë për të pastrehët, taksë që e kemi konstatuar dhe jemi akoma në proces gjyqësor, taksa e infrastrukturës si dhe ka një rritje të materialeve bazë që pasqyrohen në rritjen e çmimit të banesave. Po ashtu ka një rritje të kostove për punëtorët”, tha ai.
Dervishaj tha se, kërkesa e lartë për marrjen e një shtëpie me qira apo blerje rrit më shumë çmimet në treg, sidomos në kryeqytet.
E.H /gijotina.com
