Gjatë muajit gusht janë dërguar 66 ankesa për tenderët pranë Komisionit të Prokurimit Publik. Edhe pse ky është muaji me volumin më të ulët të procedurave të prokurimit të zhvilluara nga institucionet publike nuk kanë munguar ankesat nga garuesit. Sipas të dhënave të publikuara, në gusht u ankimuan të paktën 66 procedura, ku më shumë se gjysma e këtyre ankesave është pranuar nga ky institucion për t’u trajtuar. Kompanitë ankohen se, entet publike aplikojnë procedura të panevojshme në garë e tenderëve, duke bërë që konkurruesit të përjashtohen padrejtësisht nga gara.
Shumica e ankesave, lidhen me procedura që kanë në objekt të tyre sigurim mallrash, të paktën 59 për qind. Në vendin e dytë janë ankesat për shërbime dhe më pas vijnë ato për punë publike. Ndër të tjera, bëhet me dije se, vetëm një ankesë lidhet me fushën e mbrojtjes dhe të sigurisë ndërsa pjesa tjetër me procedurën e prokurimit publik.
Sipas të dhënave të publikuara, Tirana është qarku që mban rekordin e ankimimeve në KPP ku nga 66 në total 44 të tilla janë në kryeqytet. Kjo lidhet me faktin që në kryeqytet është e vendosur pjesa e institucioneve qendrore të cilat zhvillojnë edhe volumin kryesor të procedurave të prokurimit publik ndërkohë që më pas vijnë dy bashki me numrin më të madh të ankesave siç janë Shkodra dhe Elbasani me respektivisht nga 7 ankesa si dhe Fieri me katër të tilla.
E.H/ gijotina.com
