Biznesmeni italian Davide Pecorelli është gjetur i gjallë në Toscana të Italisë pas 9 muajsh hetime që nga gjetja e makinës së tij të djegur në Pukë. Përveçse një lajm i mirë për familjarët e tij, kjo është një ngjarje që duhet të hetohet nga specialistët për shkak se ai mashtroi policitë e dy vendeve, Shqipërisë dhe Italisë. Ai ka inskenuar djegien e makinës, ndërsa kockat e gjetura në mjet dyshohet se janë marrë në një varrezë. Shkak i këtij inskenimi gati-gati kinematografik dyshohet të jenë bërë borxhet që kishte Pecorelli në Itali ku disa nga bizneset e tij kishin falimentuar dhe synonte që përmes kësaj skeme të përfitonte siguracionet e jetës.
Biznesmeni lëvizte mes Italisë dhe Shqipërisë. Ai krijoi lidhje me një grua shqiptare më të cilën kishte edhe një fëmijë. Ndërkohë mediat italiane bënë me dije mëngjesin e sotëm, se ai ka folur në telefon me ish-gruan pasi u gjet në brigjet e Livornos në një gomone. Kjo duket të qenë pjesë e strategjisë së tij për t’u larguar prej hetuesve të cilët prej kohësh po hetonin në disa pista për “vrasjen”.
Prokuroria shqiptare i kishte dërguar Romës një listë me emrat e biznesmenëve apo edhe personave të tjerë që Davide kishte takuar në Shqipëri, ku merrej me tregtimin e makinave të shtrenjta me vlerë dhjetëra mijëra euro për qendrat e bukurisë.
Në këto kushtet pritet që Shqipëria të dërgojë një letër-porosi autoriteteve italiane ku u kërkon sqarime për inskenimin e ngjarjes në Pukë nga italiani Davide Pecorelli.
