Pas lajmit që bëri xhiron e rrjetit, mbi makinën luksoze me të cilën lëviz së fundi kryeministri Edi Rama, vjen dhe reagimi i parë nga qeveria.
Qeveria sqaron përmes zyrës së komunikimit se mjeti luksoz GMC me të cilin lëviz Edi Rama së fundmi, nuk është blerë me fonde publike.
Sipas sqarimit që qeveria i ka dhënë gazetares Esiona Konomi, automjeti i pablinduar, është marrë me qira nga Partia Socialiste prej një subjekti privat të regjistruar në emër të zonjës E. Hoxhallari.
“Automjeti në fjalë është në pronësi të një subjekti privat, me aktivitet tregtar të regjistruar sipas ligjeve në fuqi. Partia Socialiste ka një kontratë qiraje me subjektin, i cili ushtron prej më shumë se 5 vitesh aktivitet në fushën e shitjes dhe dhënies me qira të automjeteve. Automjeti nuk ka elemente të veçanta sigurie.”- thuhej në përgjigjen e qeverisë.
Ndërkohë duke iu referuar sqarimit, thuhet se mjeti me të cilin lëvizte më herët Rama ishte vjetërsuar, për shkak të numrit të madh të kilometrave.
