Prokuroria ka përfunduar hetimet ndaj grupit të personave që sulmuan me armë, në 1 dhe 8 gusht 2020, hotel “Volorekan” në Tushemisht. Hetuesit e çështjes u kanë komunikuar të dyshuarve akuzat, duke i çuar për gjykim për veprën penale “vrasje e mbetur në tentativë”.
Në dokumentin që Prokuroria ka depozituar në Gjykatë thuhet se Meard Berberi, Anterio Kaloshi dhe Ervin Kalaja, më datë 1 Gusht 2020, dyshohet se kanë lëshuar me dhjetra plumba duke zbrazur karikatorët e armëve në drejtim të makinave të parkuara në hotel “Voloreka”. Më pas, sulmi është përsëritur edhe më 8 gusht, ku po të njëjtët persona dyshohet se kanë qëlluar në drejtim të dhomës ku edhe po flinte i riu.
DINAMIKA E NGJARJES:
Anterio Kaloshi, mbrëmjen e 8 gushtit, qëlloi me 100 plumba në drejtim të dhomës së djalit të pronarit, Jetmir Muçllari. Ndërsa përsa i përket autorëve të tjerë policia bën të ditur se Ilir dhe Meard Berberi, dy organizatorët e tjerë të sulmit, kanë falsifikuar dokumentat, për të fshehur identitetin e tyre gjatë skenës së planifikuar të sulmit. Sipas policisë Ilir Berberi, është fshehur në rolin e një polici duke mbajtur me vete një mjet identifikimi nga uniformat blu, ndërsa Meardi është hequr si avokat. Mësohet se dokumentat e falsifikuara janë gjetur nga policia në mesin e arsenalit të armëve që ishin të fshehura në garazhin e Ervin Kalajës, ku fshihej prej Meard Berberi.
