Kapiteni i skuadrës së Tuetës, Sherif Kallaku ka theksuar se durrsakët janë ekipi favorit për të fituar titullin këtë edicion.
“Duke parë si rrodhi ndeshja në Shkodër, ku mbetëm për shumë minuta me 10 lojtarë, mendoj se ajo pikë ishte fitore për ne. Megjithatë mendoj se pa kartonin e kuq ne do ta fitonim ndeshjen, pasi po luanim më mirë se ata. Gjithsesi jemi të lumtur me atë një pikësh, që është i vlefshëm nëse marrim tre pikët ndaj Dinamos.
Sezonin e kaluar isha i pafat për kampionatin, pasi ika në Kroaci, por mendoj se skuadra mund t’ia kishte dalë të fitonte tripletën, po të kishte pasur më shumë fat ndaj Skënderbeut. Megjithatë këtë sezon mendoj se jemi në rrugën dhe kushtet e duhura për të fituar tripletën.”
