Thirrjeve të ambasadores amerikane Yuri Kim pas takimit të djeshëm me Lulzim Bashën, se PD duhet të shohë nga e ardhmja pa një këmbë të ngecur në të shkuarën i është përgjigjur Edi Paloka.
Kreu i Këshillit Kombëtar në selinë blu ka renditur një sërë arritjesh të PD në kohën kur në krye të së cilës qëndronte ish-kryeministri Sali Berisha, teksa thotë se e shkruara e PD është histori suksesi.
“E shkuara” e PD është histori suksesi, krenarie dhe lavdie për gjithë shqiptarët…! E shkuara e PD është përmbysja e komunizmit dhe hapja e rrugës për demokraci! E shkuara e PD është fitorja e pluralizmit në Shqipëri. E shkuara e PD është largimi i Shqipërisë nga Lindja dhe rivendosja e marrëdhënieve me SHBA e partnerët tanë natyral, Perëndimin! E shkuara e PD është vendosja e ekonomisë së tregut dhe lirisë së biznesit në Shqipëri!“
Ndër të tjera, Paloka përmend dhe anëtarësimin e Shqipërisë në NATO, ndërsa shton se PD sheh nga e ardhmja duke u nisur nga vlerat e mira të së shkuarës.
“E shkuara e PD janë anëtarësimi në NATO, liberalizimi i vizave dhe marrja e statusit të vendit kandidat në BE. E shkuara e PD është dhe celebrimi me SHBA dhe aleat i pavarësisë së Kosovës! Ne shohim nga e ardhmja, jo duke harruar e shkelmuar të shkuarën, por duke bërë të kundërtën; duke e ngritur këtë të ardhme mbi vlerat më të mira të së shkuarës e duke shkelmuar të keqen e asaj të shkuare!”, shkruan Paloka.
Deputeti demokrat ka dalë hapur në mbështetje të ish-kryeministrit Sali Berisha, në betejën e tij me Lulzim Bashën, pas vendimit për të përjashtuar liderin historik të demokratëve nga grupi parlamentar.
