Ambasadori i Gjermanisë në Kosovë, Jörn Rohde, përmes një postimi në Twitter, u ka bërë thirrje Kosovës dhe Serbisë që të ulin tensionet dhe të gjejnë zgjidhje përmes dialogut.
“Situata në veri duhet të shtensionohet. I bëj thirrja të dyja palëve që të flasin me njëra-tjetrën dhe jo për njëra-tjetrën. Rruga më e mirë përpara: takohuni në Bruksel dhe gjeni zgjidhje sa më shpejt që të jetë e mundur”, ka shkruar ai në Twitter.
Kryeministri i Kosovës, Albin Kurti ka thënë se Kosova është e gatshme që të shkojë në Bruksel për të biseduar për këtë çështje, por një takim i tillë është refuzuar nga Serbia.
Të shtunën qendra e Regjistrimit të Automjeteve në Zubin Potok është djegur, ndërsa është sulmuar edhe Qendra e Regjistrimit Civil në Zveçan. Sipas hetimeve paraprake aty janë hedhur dy granata dore, por të cilat “nuk kanë shpërthyer”.
Në orët e para të mëngjesit të sotëm, policia e Kosovës ka kaluar me automjete në qytetin e Zubin Potokut rrugës për në Bërnjak. Përveç kësaj, ushtria serbe ka fluturuar me aeroplanë “MIG” mbi hapësirën ajrore afër kufirit me Kosovën.
Që prej 20 shtatorit, në Kosovë ka hyrë në fuqi reciprociteti i targave, ku të gjitha automjetet që hyjnë nga Serbia duhet të përdorin targa të përkohshme të lëshuara nga autoritetet e Kosovës.
