Kryeministri Edi Rama ka vlerësuar akademikun Rexhep Qosja titullin “Ylli i Medaljes” në kuadër të 85-vjetorit të tij të lindjes. Në një ceremoni të veçantë ku Rama shfaqet në krah të kryeministrit të Kosovës Albin Kurti dhe anëtarë të tjerë të dy kabineteve qeveritare, kreu i qeverisë ndau qëndrimet për akademikun.
“Fort i dashur profesor, i dashur Albin, kjo ditë më bën të ndihem krenar dhe i ndrojtur është një ditë që kam dashur të vijë prej kohësh. Të nderosh një njeri të admirueshëm është të marrësh në këmbim falas uratën e tij, kjo nuk ka si të më krenojë, duke qenë se jam kryeministri më i mirë mes artistëve. Përgjatë harkut të një jete, me qasje më kulmore, vetëdija e Qoses është një tipar dallues, zotni burrë. Profesor Qosja qëndron në kohë si shembull i gjurmimit, në një kohë kur zhurmat dhe pluhurat e kanë dominuar prej kohësh mjedisin e përbashkët publik”, tha Rama.
Rama foli për veprat e akademikut ndërsa kërkoi që shqiptarët të lexojnë urtësinë e tij. Ai kujtoi mësimin që ka marrë në analizën e tij kritike të titulluar “Opozitë me duar në xhepa”. Sipas tij, në çdo takim pune ka parasysh figurën e Qoses dhe kurrë më nuk e përsërit të njëjtin gabim.
“Shqiptarët s’duhet të kërkojnë më shumë por as më pak se popujt e tjerë të Ballkanit. Bashkimi i shqiptarëve është një e drejtë demokratike, e mohuar. Shqiptarët s’duhet të harrojnë se Ballkanin e kanë të përbashkët. Çfarë kthjelltësie dhe ftese për urtësi. Siç e ka thënë profesor Rexhepi, do të udhëtojmë bashkë të gjithë ose nuk do të udhëtojmë fare”, -tha Rama.
Akademiku Qose lartësoi figurën e të dy liderëve shqiptar dhe i apeloi ata që të takohen më shpesh në mbledhje të përbashkëta për të njehsuar qëllimet e tyre politike, shoqërore, kulturore, arsimore, shëndetësore etj.
“E ndjej veten të privilegjuar që ky nderim mu bë sot në Prishtinë. E ndjej veten mirë që ky nderim i veçantë u bë pas takimit të dy delegacioneve. Të delegacionit të Shqipërisë dhe të Kosovës, të kryeministruar nga Albin Kurti. Si Rama dhe Kurti është politikan krijues. Albin Kurti është një prej intelektualëve që e shquan një cilësi e veçantë. Duhet ta dëgjojmë kur del në TV dhe tubime, duhet t’i dëgjojmë deklaratat dhe intervistat e tij për tu bindur se Albin Kurti ka një kujtesë të jashtëzakonshme, në të cilën janë mbledhur të dhëna sa në një bibliotekë mbi historitë e Evropës dhe Amerikës. Të dhëna mbi gjeografitë, artet e ndryshme, filozofitë, prej fjalimeve, e paraqitjeve të tij edhe mund të mësohet”,-tha Qosja në fjalën e tij.
Kryeministri Albin Kurti e cilësoi akademikun Rexhep Qose personalitet që bën bashkë gjuhën dhe historinë shqiptare.
“Ditëlindjen profesor Qoses duhet t’ia kremtojmë nga dy herë. Ka kontribuar edhe për Kosovën edhe për Shqipërinë. Profesor Rexhep Qose në më shumë se gjysmë shekull veprimtari ka frymëzuar studentë, veprimtarë politikë, profesor dhe intelektual në një performancës gjigante. Kontributin e tij nuk e matim dot. Për bindjen time kombi shqiptar është komb i gjuhës dhe i historisë. Historinë e kemi gjithandej në politikë, ndërsa gjuhën e kemi edhe te letërsia jonë. Nuk mund të mendoj ndonjë personalitet tjetër të gjallë që i bën bashkë historinë dhe gjuhën tonë. Jam ndikuar prej tij meqenëse edhe sot besoj se romantizmi është ilaçi më i mirë ndaj cinizmit”, u shpreh Kurti
