Deputeti i Lushnjes, Saimir Korreshi ka vijuar me reagimet “perlë” në rrjetet sociale, ku kësaj here ka ironizuar mbledhjet e Komisioneve Parlamentare.
Korreshi shprehet se 97% e shqiptarëve nuk kanë mundësi të blejnë ushqimet për të mbajtur familjet dhe presin “logimin” për të vënë në zjarr tenxheren dhe jo të dëgjojnë përrallat.
“Si t’ia shpjegoj mamasë time fjalën LOGIM?! Sot në ditën e parë të mbledhjes të Komisionit të ligjeve, paturpësitë, që në kostituimin e këtij Komisioni edhe pse të gjithë anëtarët e opozitës ishin prezent, shoqja kryetare u mohoj fjalën. Në kundërshtim të plotë me çdo normë. Preteksti ?? I thjeshtë fare. Që të merrje fjalën edhe pse prezent në sallën e mbledhjeve duhet të LOGOHESHIM. Po po kështu u shpreh kryetarja e Komisionit të Ligjeve. Kjo fjalë (Logim) i kishte bërë përshtypje mamasë time kur i thashë pse nuk na dhanë fjalën. Tani si t’ia shpjegoj me fjalë të tjera të thjeshta, por jo vetëm mamasë, por si mamaja ime është mbi 50 % e popullsisë së mbetur në Shqipëri. Shoqja Kryetare 97% e Shqiptarëve nuk kanë mundësi të blejnë ushqimet për të mbajtur familjen dhe fëmijët dhe presin “Logimin” tuaj për të vënë tenxheren në zjarr qoftë dhe me fasule e jo të dëgjojnë përrallat e tua. Ndaj vërini gishtin kokës se u bëtë gazi i botës”, shkruan Korreshi.
Më herët janë zbardhur dhe debatet nga grupi i Komisionit të Ligjeve në “WhatsApp”, ku deputetët e opozitës kundërshtojnë mbledhjet online.
Nuk mungon komenti i deputetit Korreshi, i cili me humor thotë se “andej nga Lushnja sikur s’na punon mirë interneti e mund të lindin probleme që na ngel figura ngrehur”.
Debati për KP u zhvillua javë e kaluan në Kuvend ku socialistët kërkuan që mbledhjet të zhvillohen online si vitin e kaluar si masë kufizuese për ndalimin e përhapjes së pandemisë, ndërsa deputetët demokratë kanë bërë të qartë se do të paraqiten fizikisht sepse nëse mbledhjet zhvillohen online, asgjë nuk do ishte e qartë për qytetarët.
