Kosova dhe Serbia do të takohen sot në Bruksel pas situatës së krijuar në veri, ku qytetarët serbë kanë bllokuar rrugët që dërgojnë për te pikat kufitare Jarinjë dhe Bërnjak, në shenjë pakënaqësie ndaj vendimit të qeverisë kosovare për reciprocitetin në targa.
Ky takim ka ngritur edhe një çështje tjetër diskutimi, nëse zyrtari i lartë i Departamentit të Shtetit amerikan, Gabriel Escobar, do të marrë pjesë gjithashtu.
Kjo sepse Ambasada e SHBA-së në Prishtinë ka konfirmuar që ai do të marrë pjesë në diskutime, ndërsa nga Brukseli kanë bërë me dije se në diskutime do jenë vetëm tri palë Kosova, Serbia dhe BE-ja, dhe se të tjerët e mbështesin dialogun vetëm nga jashtë.
Një zëdhënës i Ambasadës së SHBA në Prishëtinë, ka thënë për mediat kosovare se Escobar do të udhëtojë drejt Brukselit dhe se mbështesin fuqishëm dialogun e ndërmjetësuar nga Bashkimi Evropian si palë e interesuar në këto diskutime dhe partnere e Kosovës dhe Serbisë.
“Ne jemi të kënaqur që Serbia dhe Kosova do të dërgojnë përfaqësues në Bruksel këtë javë për diskutime dhe inkurajojmë të dy palët që të ri-angazhohen hapur, seriozisht dhe menjëherë. Zëvendësndihmës Sekretari i Departamentit të Shtetit për Çështjet Evropiane dhe Euroaziatike, Gabriel Escobar, do të udhëtojë në Bruksel këtë javë për të marrë pjesë në këto diskutime. Përderisa udhëhiqet nga palët, Shtetet e Bashkuara të Amerikës mbështesin fuqishëm dialogun e ndërmjetësuar nga BE-ja si palë e interesuar në këto diskutime dhe si partnere e Kosovës dhe Serbisë”, thuhet gjithashtu në përgjigje.
Zëdhënësi i BE-së, Peter Stano, ka thënë rreth pjesëmarrjes së Gabriel Escobar se në diskutimet që pritet të mbahen në Bruksel, në dialog janë vetëm tri palë, Kosova, Serbia dhe BE-ja, ndërsa ka thënë se të tjerët vetëm e mbështesin dialogun nga jashtë.
Takimi i parë ndërmjet kryeministrit Kurti dhe Presidentit Aleksandër Vuçiç u zhvillua në Bruksel më 16 qershor, ku përfundoi pa rezultate konkrete por me akuza të ndërsjellta mes palëve.
