Komisioni i Venecias në 14 tetor pritet të japë një vendim për shkarkimin nga detyra të presidentit Ilir Meta.
Ai ka qenë i pranishëm në qytetin e Pogradecit, ku në një prononcim për gazetarët, i pyetur nëse i druhej një vendimi të tillë Meta përgjigjet se kjo çështje është politike dhe se çdo sjellje e tij ka qenë pro kushtetutës.
“Jam krenar për gjithë veprimtarinë time në mbrojtjen e Kushtetutës, e cila është sulmuar në mënyrën më armiqësore, më tradhtare nga faktorë të jashtëm dhe të brendshëm për të pasur Shqipërinë sot një situatë aspak të dëshirueshme, në raport edhe me BE. Kuvendi duhet të kishte çelur negociatat me kohë nëse do dëgjohej presidenti mbi zgjedhjet vendore apo Gjykatën Kushtetuese”, është shprehur ai.
Presidenti ka folur gjithashtu edhe për zhvillimet dhe tensionet aktuale brenda selisë blu. Edhe pse pritej që nga reagimi i tij të mbante një qëndrim të njëanshëm, Meta është shprehur i rezervuar lidhur me zhvillimet në Partinë Demokratike, ku ish-lideri i saj Sali Berisha ka nisur aksionin për të shkarkuar Lulzim Bashën.
Për këtë çështje ai është shprehur se nuk dëshiron të komentojë çështjet e brendshme të një partie politike, ndërsa këshilloi se të gjithë duhet ti përmbahen parimeve bazike të demokracisë.
“Nuk dëshiroj të komentoj zhvillimet e brendshme në asnjë forcë politike. Duhet ti zhvillojnë debatet e tyre në mënyrë demokratike. Demokracia nuk është e vënë njëherë e përgjithmonë, ka ulje-ngritjet e saj. Shpresojmë të gjithë t’i përmbahen parimeve më bazike të demokracisë,”tha ai.
Sakaq lidhur me akuzën e fortë të Sali Berishës se ka një marrëveshje mes Bashës dhe Ramës, ai është shprehur se kjo çështje do të gjykohet pas 24 korrikut, sipas kushtetutës.
“Nuk dëshiroj të bëhem pjesë e këtyre debate, do ti keni kohë ti gjykojmë pas 24 korrikut. Janë çështjet e tyre për mua ka rëndësi të gjithë të respektojnë kushtetutën dhe dinjitetin e çdo qytetari”, është shprehur ai.
I pyetur se a e ka parë ndonjëherë vendin me një opozitë kaq të dobët, Meta nuk heziton të përmendë skenarë.
“Jam i bindur se nuk ka përpjekje në botë që të realizojë atë skenar të zi për të lënë Shqipërinë pa opozitë. Një skenar që luhet prej shumë vitesh dhe jam i sigurt që shqiptarët nuk do të pranojnë kurrë të kthehen në modele që nuk janë as në kontinentin ton, shqiptarët kanë potencial të jashtëzakonshëm për të ecur përpara,” tha Meta.
Sipas tij skenari në fjalë luhet prej shumë vitesh dhe ka si qëllimtë lërë vendin pa opozitë.
