Këtë të enjte Kombëtarja U-21 do të ndeshet me Andorën në ‘Elbasan Arena’ për kualifikueset e Europiani 2023.
Teksa ka folur në konferencën për mediat përpara kësaj sfide, trajneri Alban Bushi ka theksuar se çdo kundërshtar është shumë i fortë për ta, madje edhe Andora pavarësisht rezultateve të marra.
“Andorën e shohim njësoj sikur të kemi Gjermaninë përballë, pra mezi e presim atë ndeshje. Për të thënë që nuk jemi ne ata që kemi humbur në Çeki, por i tillë ishte fati. Ne kemi shpirtin e garës dhe duam me patjetër një fitore.”-tha ai.
I pyetur për mungesat e Çepeles dhe Gecit, tekniku i ‘Shpresave’ theksoi se ka shumë lojtarë të mirë me të cilët mund t’i zëvendësojë.
“Prandaj jemi ekip Kombëtar kemi shumë lojtarë të mirë. Ata janë shumë të mirë, por kemi dhe lojtarë të tjerë të mirë për t’i zëvendësuar si Çepelen dhe Gecin.” -shtoi Bushi.
Ndërsa për afrimet e lojtarëve të kampionateve shqiptare, ai u shpreh se i jep mundësinë çdo futbollisti që i duket në nivel të mirë, por sipas Bushit ata duhet të tregohen të zgjuar dhe ta shfrytëzojnë atë për të ecur përpara dhe që të pikasen nga klube të huaja.
“Ne mundohemi që të afrojmë lojtarët që japin goxha kontribut në kampionatin shqiptar. Por ka lojtar inteligjent dhe jo inteligjent, duhet ta shikojë nga ana pozitive që janë grumbulluar dhe të mos duan me patjetër të luajnë. Pasi thjesht grumbullimi i ndihmon shumë ata dhe duhet vlerësuar Kombëtarja më shumë. Si në kombëtaren e parë kemi lojtarë në moshë goxha të re si Broja apo Kumbulla.”-shtoi trajneri.
I pyetur edhe për humbjen me Çekinë dhe sa ka ndikuar ajo te gjendja e skuadrës, kreu i stolit të ‘Shpresave’ u shpreh: “Humbja 4-0 në Çeki. Unë mendoj që humbjet përveç se gjëra të mira nuk nxjerrin gjëra negative, ne mësojmë shumë nga çdo humbje. Ky është futbolli mund të ndodhë që të hamë dy gola, por duhet të reagojmë që të kthejmë rezultatin siç ndodhi me Andorën në ‘Elbasan Arena’. Humbjet nuk kanë asnjë lloj problemi, pasi Çekia është një kundërshtarë shumë i fortë, por e rëndësishme është që të marrim mësim.”
Ritheksojmë se takimi i Kombëtares U-21 me Andorën do të luhet këtë të enjte në orën 19:00 në stadiumin ‘Elbasan Arena’./K.T/Gijotina.com
