Fizioterapisti i skuadrës së Laçit Dario Zrniç, bëri një ndërhyrje shpëtimare ndaj mbrojtësit të kurbinasve Viktor Velkovskit i cili ra në fushë pa ndjenja në sfidën ndaj Tiranës fundjavën e fundit në kryeqytet. Ai tregon momentin kur ndërhyri në fushë ndërsa u ndal edhe tek futbolli i moshave ku sipas tij mungojnë kushtet minimale për ti ardhur në ndihmë lojtarëve.
“Faktikisht, Velkoski gjatë ndeshjes mori një goditje në fyt, në grykë, dhe për momentin nuk arriti të merrte frymë. Për të qenë i sinqertë, për mua si dhënës i ndihmës së parë, nuk ishte një problem kritik apo situatë ku mund të rrezikohej jeta. Në momentin e parë kishte frikë dhe u krijua panik në fushë, por për mua si ekspert prej 20 vitesh në detyrën që bëj me traumat sportive, ishte thjesht diçka rutinë.
Sapo mbërrita, pashë që gjuha po i hynte brenda, ndaj veprimi i parë ishte nxjerrja e gjuhës dhe krijimi i hapësirës për të liruar frymëmarrjen.
Që në fillim konstatova se nuk ishte një problem i madh dhe me nxjerrjen e gjuhës gjithçka u stabilizua te lojtari. Gjithsesi, për një person pa eksperiencë mund të përbënte problem ai dëmtim që pësoi lojtari. Në raste të tilla rëndësi ka që të mos biesh në panik dhe me qetësi të administrosh situatë. Me 20 vjet punë që kam në këtë fushë, ai problem që pati Velkoski është gjë rutinë.
Kur luhen ndeshje moshash U-16 apo U-13, askush nuk i merr me seriozitet këto takime. Thjesht nga një goditje që mund të marrë fëmija nga topi në stomak, mund të krijohen probleme. Nëse nuk ke ambulancë afër, gjërat mund të bëhen serioze për jetën. Plus edhe fëmijët e anashkalojnë lëndimin dhe e marrin më lehtë, duke mos i vlerësuar goditjet. Te fëmijët, në mungesë të stafeve profesionale mjekësore, mund të ndodhin edhe tragjedi. Ndërsa te ndeshjet e skuadrave profesioniste, kryesisht të të rriturve, gjërat janë më të thjeshta, pasi ke pranë ambulancë dhe stafe mjekësore që janë të gatshëm për të dhënë ndihmën e parë. Te moshat mund të ketë autoambulancë, por në shumë raste i pranishëm është vetëm shoferi.”
