Reshjet e shiut kanë shkaktuar problemet e para në qytetin e Vlorës. Lagjja “24 Maj”, në qytetin bregdetar, është përmbytur si pasojë e shiut, teksa ky fakt ka irrituar banorët e zonës. Sipas asaj çka ata deklarojnë, nuk është investuar që prej vitit 1993. Banorët pohojnë se asnjë përfaqësues institucioni apo politik, nuk shkon ta shohë situatën me të cilën ata përballen çdo ditë.
Banori: “ Kjo rrugë, ka qenë e tillë që prej vitit 1993, askush nuk vjen të shohë nga afër situatën. Jam rritur këtu, na kanë lënë gjithmonë pas dore. Ama, sa herë vijnë deputetët, u japim votën.”
Ndër të tjera qytetari bën krahasime të lagjeve të qytetit me shëtitoren “Lungomare”, për të cilën pohon : ”Ka bërë “Lungomaren”? Po është njëlloj si unë të vesh kostum, por çorapet t’i kem të grisura”.
Kjo është një pamje me të cilën përballen çdo ditë qytetarët vlonjatë, pasi Vlora mbetet ndër qytetet më problematike për sa i përket infrastrukturës dhe mungesës së kanalizimeve.
